अकटाक्ष (उल्लास मक्रातीको कविता)

परीक्षाको कलममा सपना रेट्ने धार रै’छ
अखबारको शीर्षकमा बुनेहरूको गुहार रै’छ
डिग्रीवाला युवालाई हर दिन शनिबार रै’छ
कारैकारको काठमाण्डू त वास्तवमै बेकार रै’छ

भाइमाराको गलामा तीस किलोको हार रै’छ
देश जाओस् भाड में तिनको नैयाँ पार रै’छ
सर्वहारा नेताज्यूको सिसाको दरबार रै’छ
कारैकारको काठमाण्डू त वास्तवमै बेकार रै’छ

चुनाव चिह्नको करौँती जिब्रो रेट्ने तरबार रै’छ
करारवाला खरिदारको आफ्नै यहाँ घरबार रै’छ
समृद्धिको सरकारलाई फेसबकुमा काटमार रै’छ
कारैकारको काठमाण्डू त वास्तवमै बेकार रै’छ

पैसा खेस्रा सस्तो यहाँ महँगी बेच्ने बजार रै’छ
शहीदको छोरालाई अरब जान हतार रै’छ
भाइ पढाउन शहर आ’की लीला नाँच्ने बार रै’छ
कारैकारको काठमाण्डू त वास्तवमै बेकार रै’छ

मास्कले छोपी फेर्नुपर्ने शुद्ध हावाको बहार रै’छ
डाक्टर सा’पको घाँटीमा टीबीवाला खकार रै’छ
देशभक्त एउटा नेता भट्टीमा लाचार रै’छ
कारैकारको काठमाण्डू त वास्तवमै बेकार रै’छ ।