पवन मरासिनी, पोखरा कार्तिक २३/ स्याङ्जाको अर्जुनचौपारी गाउँपालिकामा रहेका विभिन्न विद्यालयका चेन्ज मेकर क्लबहरूले शुक्रबार सामूहिक रूपमा विभिन्न स्थानहरूमा सरसफाइ तथा व्यवहारिक सिकाइ कार्यक्रम सम्पन्न गरेका छन् । गाउँपालिकाका ६ वटा वडामा रहेका २ आधारभूत, ६ माध्यमिक सामुदायिक तथा १ माध्यमिक संस्थागत विद्यालयका क्लबहरूले एकैदिन आ–आफ्नो विद्यालय र समुदायमा सकारात्मक गतिविधि सञ्चालन गरेका हुन् ।
विद्यार्थीहरूमा सामाजिक उत्तरदायित्व, सामुदायिक सहयोग, र व्यवहारिक सीप विकासमा प्रेरणा जगाउन मद्दत गर्ने भएकाले यस्ता कार्यक्रमको आवश्यकता र अपरिहार्यता रहेको अर्जुनचौपारी गाउँपालिका अध्यक्ष प्रकाश तिवारीले बताए ।
वडा न १ अन्तर्गत रहेको पञ्चकन्या माध्यमिक विद्यालयको चेन्ज मेकर क्लबले विद्यालय परिसर, पालिकाको खेलमैदान, र अर्जुनचौपारी स्वास्थ्यचौकीमा विज्ञान विषयसँग सम्बन्धित वल्र्ड ग्रुप परीक्षण कार्यक्रम सम्पन्न गरेको छ । त्यस्तै, सोही वडामा रहेको संस्थागत विद्यालय अर्जुनचौपारी चिल्ड्रेन एकेडेमीको क्लबले विद्यालय परिसरमा सरसफाइ कार्यक्रम सञ्चालन गर्यो ।
यसैगरी, वडा नं। २ मा रहेको अमर ज्योति माध्यमिक विद्यालयको चेन्ज मेकर क्लबले बालबालिकाको व्यवहारकुशल सीप विकास तथा व्यक्तिगत सरसफाइमा आधारित व्यवहारिक सिकाइ कार्यक्रम गर्यो । वडा न ३ मा रहेको सरस्वती आधारभूत विद्यालयको क्लबले विद्यालय परिसर, ट्यांकी तथा नजिकैको मन्दिर क्षेत्रमा सरसफाइ अभियान सञ्चालन गर्यो ।
यस्तै, वडा न ४ अन्तर्गत जन माध्यमिक विद्यालयले एकानन्द गुफा जाने गोरेटो बाटो र गुफा परिसरमा सरसफाइ अभियान सञ्चालन गरेको छ। यस्तै गरि, वडा न ५ मा रहेका सर्वोदय माध्यमिक विद्यालय, घण्टे माध्यमिक विद्यालय र बुद्ध आधारभूत विद्यालयका चेन्ज मेकर क्लबहरूले क्रमशः डहरे देउराली मन्दिर जाने बाटो, विद्यालय परिसर, घण्टे बजार र विद्यालयको खानेपानी मुहान, तथा विद्यालय परिसर सरसफाइ कार्य गरेका छन् ।
वडा न ६ अन्तर्गत दरौं माध्यमिक विद्यालयको चेन्ज मेकर क्लबले नेपालकै पहिलो नवग्रह मन्दिर परिसरमा सरसफाइ गर्दै मन्दिरभित्र रहेका पिपलका बिरुवाहरूमा गोडमेल गर्ने कार्य सम्पन्न गरेको छ ।
