जिल्ला प्रशासन कार्यालय बागलुङले ताराखोला गाउँपालिका–२ मा चट्याङ लागेर आफन्त गुमाएको एक परिवारलाई आर्थिक राहत प्रदान गरेको छ ।
वैशाख २ गते चट्याङ लागेर मृत्यु भएका खिमानन्द कँडेलको परिवारलाई २ लाख ५० हजार सहयोग गरिएको हो । संघीय सरकारबाट प्राप्त २ लाख र प्रदेश सरकारको ५० हजार रुपैयाँ जिल्ला दैवी प्रकोप उद्धार समितिका संयोजक तथा प्रमुख जिल्ला अधिकारी शिवकुमार कार्कीले कँडेलकी पत्नी शान्ति कँडेल शर्मालाई हस्तान्तरण गर्नुभएको थियो ।
कँडेल परिवारलाई थप सहयोग जुटाउनको लागि गाउँपालिकासँग पनि समन्वय गर्न लागेको प्रमुख जिल्ला अधिकारी शिवकुमार कार्कीले बताउनुभयो । चट्याङ लागेर गम्भीर घाइते भएका ४४ वर्षीय कँडेललाई धौलागिरि अस्पताल ल्याउँदै गर्दा मृत्यु भएको थियो ।
प्रकाशित मिति २०७८ असार २४ गते बिहिबार ०६:२८
