आस्थाका आधारमा पत्रकारले समाचार लेख्न नहुने थापाको भनाई
प्रेस चौतारी नेपाल जिल्ला शाखा बागलुङमा स्थापित ‘प्रेस चौतारी क्रियाशील पत्रकारिता पुरस्कार’ बाट बागलुङ का तीन पत्रकार पुरस्कृत भएका छन् । आज आयोजित शाखाको छैठौँ अधिवेशनका अवसरमा विसं ०७५, ०७६ र ७७ को पुरस्कार एकसाथ प्रदान गरिएको हो ।
रु. दश हजार राशिको सो पुरस्कार पत्रकार रामकृष्ण शर्मा, रामकृष्ण बोहोरा र गणेश पौडेल ‘चन्द्र’ले प्राप्त गर्नुभएको हो । शर्माले ०७५, बोहोराले ०७६ र पौडेलले ०७७ को पुरस्कार पाएको शाखा अध्यक्ष उमाकान्त शर्माले जानकारी दिनुभयो ।
अधिवेशनको उद्घाटन समारोहमा नेकपा (एमाले) का पोलिटब्यूरो सदस्य लिलबहादुर थापा र शाखा अध्यक्ष शर्माले पत्रकार त्रयलाई संयुक्त रुपमा नगद, प्रमाणपत्र र दोसल्ला प्रदान गर्नुभएको थियो ।
पुरस्कत पत्रकार शर्मा प्रेस चौतारीको केन्द्रीय सचिव, बोहोरा र पौडेले केन्द्रीय सदस्य हुनुहुन्छ । तीनै जनाले पत्रकारितमा लामो अनुभव सँगालेका छन् । बोहोरा अहिले ढोरपाटन दैनिकको कार्यकारी सम्पादकको जिम्मेवारीमा हुनुहुन्छ ।
पौडेल गोरखापत्र संस्थान, गण्डकी प्रदेश कार्यालयको निवर्तमान संयोजक हुनुहुन्छ । पुरस्कार ग्रहणपछि बोल्दै पत्रकार शर्माले पुरस्कारले पत्रकारितामा थप जिम्मेवार बनाएको प्रतिक्रिया दिनुभयो ।
विसं २०७३ मा स्थापित सो पुरस्कारबाट यसअघि पत्रकार हरिनारायण गौतम र रामबहादुर जिसी पुरस्कृत भइसक्नुभएको छ । गोरखा भूकम्पपछि बनेको ‘भाग्यले बाँचेकाहरु’ वृत्तचित्रको व्यावसायिक प्रदर्शन गरेर पुरस्कारको अक्षयकोष खडा गरिएको प्रेस चौतारी बागलुङले जनाएको छ ।
‘आस्थाका आधारमा पत्रकारले समाचार लेख्न नहुने थापाको भनाई
नेकपा एमालेको पोलिट व्यूरो सदस्य तथा खेलकूद विभागका प्रमुख लिल बहादुर थापा मगरले पत्रकारहरुले सत्यको अन्वेषण गर्नुपर्ने बताउनुभयो । प्रेस चौतारी नेपाल बागलुङको छैठौं जिल्ला भेलालाई सम्बोधन गर्दै नेकपा एमाले गण्डकी प्रदेशका सह–इन्चार्ज समेत रहनुभएका नेता मगरले पत्रकारहरुले सत्य तथ्यको अन्वेषण गरेर मात्रै समाचार बाहिर ल्याउनुपर्ने बताउनुभयो ।
पत्रकारहरु बिचारले जे भएपनि समाचारमा सत्य तथ्य र सन्तुलित हुनुपर्ने उहाँको तर्क रहेको छ । “हाम्रो विचार राजनैतिक आस्थामा हुन्छ, आस्था राख्न पाउनु अधिकार पनि हो” मगरले भन्नुभयो “तर समाचारमा सन्तुलन हुनुपर्दछ, राजनैतिक आस्थाका आधारमा समाचार लेख्न भएन, विचारमा स्पस्टता भएपनि समाचारमा सत्यता हुन आवश्यक छ ।” अहिलेका पत्रकारहरु अध्ययनशिल, प्रविधिमैत्री र व्यावसायिक हुन आवश्यक रहेको नेता मगरको भनाई रहेको छ ।
उहाँले पत्रकारहरुलाई राज्यले सकरात्मक ढंगले हेर्नुपर्ने र पत्रकारले राज्यको सकरात्मक कामहरुको प्रचार गर्दै नकरात्मक काममा सुझाव दिनुपर्ने बताउनुभयो । कार्यक्रममा बोल्दै अर्का पोलिटव्यूरो सदस्य मन कुमारी केसीले राजनैतिक परिवर्तनमा पत्रकारहरुको ठूलो भूमिका रहेको बताउनुभयो ।
साभार- आर्दश अनलाईन
