तमानखोलामा शून्य संक्रमित भएको ११ दिनमै ५ स्वास्थ्यकर्मी सहित ४१ संक्रिय संक्रमित,

बागलुङ जिल्लाको तमानखोला गाउँपालिकामा ५ स्वास्थ्य कर्मी सहित कोरोनाका सक्रिय संक्रमितको संख्या ४१ पुगेको छ ।
लक्षण सहितका बिरामी धेरै भेटिए पछि केहि दिन पहिला ४३ जनाको स्वाव संकलन गरि पिसिआरको लागि बाग्लुङ पठाईएकोमा २२ जनाका संक्रमण देखिएको हो । तमानखोला गाउँपालिका १ बोंगादोभान बजारमा मात्र अहिले ३९ जना कारोनाका सक्रिय संक्रमित रहेको गाउँपालिकाका स्वास्थ्य संयोजक तिलक छन्त्यालले बताउनुभयो ।
संक्रमित मध्यबाट ४ जनालाई अक्सिजनको सहायतामा राखिएको छ भने कोभिड–१९ को उपचार, नियन्त्रण तथा रोकथाम गर्न फ्रन्टलाईनमा खटिने ५ जना स्वास्थ्यकर्मी संक्रमित भएका छन् । पालिकामा संक्रिय संक्रमितको संङ्ख्या बढ्दो छ तर उपचार गर्ने स्वाथ्यकर्मी नै संक्रिमित हुदाँ उपचार गर्न समस्या भैरहेको संयोजक छन्त्यालको भनाई छ ।
बोंगादोभान बजारमा ३९ जना सगैँ तमानखोला भित्र अहिले ४१ जना कोभिड–१९ को सक्रिय संक्रमित पुगेका छन,संयोजक छन्त्यालले भन्नुभयो‘ हामीले पालिकामा सक्रिय संक्रमितको सङ्ख्या शुन्यमा झार्ने हरदम प्रयास गरिरहेका छौँ । तर केहिले लक्षण देखिए पछि पनि समयमै परीक्षण गर्न नमान्दा तथा बेवास्ता गर्दा संक्रमण न्यूनिकरणमा समस्या परेको छ ।’
गत असार ३ गते बिहिबार एकैदिन ९ जना कोरोना संक्रमित निको भए सङ्गै तमानखोला गाउँपालिकामा कोभिड–१९ को सक्रिय संक्रमितकोे संख्या शून्य भएको थियो । तर असार १४ गते सोमबार सम्ममा आईपुग्दा संक्रिय संक्रमितको संख्या क्रमशः४० बाट उकालो लागेको छ ।
गाउँपालिकामा कोभिड–१९ दोस्रो लहरमा अहिलेसम्म पिसिआर विधिबाट २७५ जना र एन्टिजेन विधिबाट ४५ जना गरि कुल ३२० जनाको परिक्षण गरिएको छ । जसमा १८१ जनामा कोरोना संक्रमण पुष्टि भएको छ । दोस्रो लहरको कोरोना संक्रमणबाट पालिकामा २ जना संक्रमितले ज्यान गुमाएका छन् भने १३८ जना संक्रमण मुक्त भई डिस्चार्ज भएको संयोजक छन्त्यालले जानकारी दिनुभयो ।
जनस्वास्थ्यको मापदण्ड पूर्णरुपमा पालना गरी जिम्मेवार बन्नुहुन साथै कोभिड–१९ संग मिल्दो जुल्दो लक्षण देखिएमा तुरुन्त नजिकको स्वास्थ्य संस्थामा सम्पर्क राख्न गाउँपलिकाले आग्रह गरेको छ । बोंगादोभान बजार क्षेत्रमा लक्षण सहितका विरामी बढि संङ्ख्यामा भेटिन थालेसंगैँ गत असार ११ गते देखि जारी गरिएको निषेधाज्ञा १७ गते राति १२ बजे सकिदैँछ ।