बुर्तिबाङ- ईलाका प्रहरी कार्यालय बुर्तिबाङ द्धारा घरेलु मदिरा बनाउन प्रयोग गरिने कच्चा पदार्थ २ सय ५० केजी मर्चा आज नष्ट गरेको छ ।
ढोरपाटन नगरपालिकाको वडा नं. १ बुर्तिबाङ बजारमा उत्पादन गरि सुकाइएको अवस्थामा प्रहरीले बरामद गरि ल्याएको मर्चा नष्ट गरिएको इलाका प्रहरी कार्यालय बुर्तिबाङका प्रहरी निरीक्षक जयराम वन्तले बताउनुभयो ।
बजारमा दुई भिन्न भिन्न ठाउँबाट बरामद गरिएको मर्चा स्थानीय प्रशासन, जनप्रतिनिधि तथा पत्रकारहरुको रोहबरमा नष्ट गरिएको प्रहरी निरीक्षक वन्तको भनाई छ । सरकारले घरेलु मदिरा बन्देज गरेकोले सोको उत्पादनमा प्रयोग हुने मर्चा समेत बरामद गरि नष्ट गर्नुपरेको उहाँले बताउनुभयो । बजार तथा गाउँ क्षेत्रमा अधिक मात्रमा उत्पादन हुने घरेलु मदिरा सेवनबाट विभिन्न अपराधिक घटनाहरु हुने र सोको उजुरी प्रहरीमा आउने गरेको प्रहरीले जनाएको छ ।
नेपाल प्रहरीको घरेलु मदिरा उत्पादन न्यूनिकरण गर्ने कार्यक्रम अनुसार मदिरा तथा मदिरा बनाउने कच्चा पदार्थ बरामद गर्ने र नष्ट गर्ने गरिएको उहँले बताउनु भयो ।
